අවතාරයක් සමග සටනක්
සාමාන්ය පෙළ විභාගයට පාඩම් කරන්න මගේ යාලුවෝ හැමෝම ආවේ අපේ ගෙදරට. කට්ටියම රෑ 8.00 විතර වෙනකොට අපේ ගෙදරට එනව, සිකුරාද දවස්වල සෙට් වුණාම අපි පහුවදා එලා වෙනකම්ම වගේ පාඩම් කරනව. අනිත් දවස් වලට පාන්දර 01,02 විතර වෙනකම් පාඩම් කරනව. මුලින් පාඩම් කරන්න පටන් ගත්ත කාලේ මිතුරන් දෙදෙනකු පමණක් සිටි අතර මසයක් දෙකක් ගතවන විට එම ප්රමාණය 10 දෙනෙකු දක්වා වර්ධනය වුණා. ඒකට හේතුව විදියට මම දකින්නේ පාඩම් කිරීමට අමතරව භාහිර ක්රියාකාරකම්වල යෙදීම තමයි. නිදිමත හැදීගෙන එනකොට කවුරැ හරි එකෙක් කියනව අපි මඤ්ඤොක්ක ගලවන්න යමු, කුරැම්බා කඩන්න යමු, අන්නාසි කඩන්න යමු, අපේ අයියලගෙ හැටි දන්නවනේ ඉතින්. ඔය වගේ ගිහින් පොලු පාරවල් නොකා බේරැණ අවස්ථා අනන්තයි.
පාඩම් කරන අතරතුර හොරකමේ යන පිරිසට අමතරව, බූරැ ගැසීම, දාන් ක්රීඩාව, කැරම් ගැසීම ආදිය සිදුකරගෙන ගෙට වෙලා අම්ම තාත්ත ඇහැරුණාද කියල ඔත්තු බලන්න වෙනම සෙට් එකක් හිටියා. තේ ටිකක් එහෙම හදල දෙන්න අම්ම නැගිට්ටොත් නිවුස් එක දෙනව පට ගාල. ඔය හැමෝ්ටම අමතරව ලැප් එකක් උස්සන් ඇවිත් හැමෝටම නිල් චිත්රපටි පෙන්නන එකෙකුත් හිටියා ඉතින්. අපි ඉතින් ඔන්න ඔය වගේ සෙට් එකක් එක්ක තමයි සාමාන්ය පෙළට මුහුණ දුන්නේ.
ඔය විදිහට විනොදෙන් කාලේ ගෙවීගෙන ගියා. මොන දේ කළත් අපි හැමොටම හොදට ඉගෙන ගන්න පුලුවන් වුණා. ඉස්කෝල පහකට යන යාලුවො හිටියා පාඩම් කරන්න. එක දවසක් කට්ටිය පාඩම් කරන්න එකතු වුණ දවසක අල්ලපු ගමේ මරණ ගෙයක් වෙලා කියලා ආරංචියක් ආව. කට්ටියට ඉතින් ෆුල් හැපි. කට්ටිය මළගෙවල් පැත්තෙ ගිහින් එමු කියල කතාවෙලා ගෙදරටත් කියල ගියා මල ගෙවල් පැත්තෙ. ගිහින් කැරම් අතක් හෙම ගහල (කවුරැත් කැමති නෑ අපි එක්ක කැරම් ගහන්න, අපි සෙට් එක කැරම්ම ගහන නිසා අපි මල ගෙවල්වල කැරම් ශුරයෝ කියල නම ගිහින් තිබුණේ ;) හේ.....) බුලත් විටක් එහෙමත් හපල සෙට් වුණා වයසක සෙට් එකක් ළගට, පොඩි බයිට් පාරක් දාන්න කියලා හිතාගන. එතෙන්ට යනකොටත් කට්ටිය බර කතාවක්. වයසක උන්දෑ කෙනෙක් එයාට සිද්ධවුණ කතාවක් කිය කිය හිටියේ.
බැලුවාම පේන විදියට ඒ මනුස්සයට වයස අවුරැදු 60 පැනල. ඒක නිසා එයාට සීයා කියමුකො. සීයා කිය කිය හිටියේ එයාගේ තරැණ කාලේ මූණ දුන්නු සිදුවීමක්. ඒ කියන්නේ වයස අවුරැදු 20 විතර. සීයා ඉතින් කතාව ලස්සනට කිව්වා. මම කියන්න යන මට මුහුණදෙන්න සිද්ධවුණු සිදුවීම් මාලාවේ ආරම්භය සිදුවුණේ මේ සීයාගේ කතාව ඇහුවට පස්සේ ඉදලා, ඒක නිසා සීයා කිව්ව කතාව කෙටියෙන් කියන්නම වෙනවා. (අර නිකම් ටීවී එකේ යන ඉන්දියානු කථා වගේ. හික්ස්....)
සීයා කොහොම හරි ඔය කියන කාලෙ වෙනකොට ගමේ කාටවත් බය නැති, චණ්ඩිය වගේ හිටිය ඩයල් එකලු, කසිප්පු පෙරන එකලු රැකියාව විදිහට කළේ, එයා කට්ටිය දාල අරක්කු හොරෙන් පෙරැවලු. සීයා තමයිලු මුදලාලි වගේ හිටියේ.පෙරනව වගේම හොදටම බීමටත් ඇබ්බැහි වෙලාලු හිටියේ. හැමදාම රෑට හොදට සප්පායම් වෙලා කුණුහරුප කිය කිය, අහල පහල මිනිස්සුන්ටත් කෑ ගගහලු ගෙදරට යන්නේ. අම්මා තාත්ත කුඹුරැ වැඩ තමයි කරල තියෙන්නේ. සීයගේ පවුලට හොදට සල්ලි බාගේ හෙම තිබිලා තියෙනව. කොච්චර තිබුණත් සීයට කෑල්ලක් බෑල්ලක් හෙම සෙට් කරගන්න බැරිලු, සීයාගේ කල් කිරියාව හොද මදි නිසා කවුරුවත් සීයාට කැමති නෑලු. ඉතින් කොහොම හරි සීයාගේ තාත්ත ගේමක් ගහල වැදගත් පවුලකින් සීයාට කටයුත්තක් සූදානම් කරල දුන්නලු. වැඩෙත් ස්ථීර වෙලා (ඇත්තටම සීයා විවාහ වුණේ එයා එක්කලු) ගෙවල් වලිනුත් ගිහින් කතාබහ කරගත්තලු. ගෑහැණු ලමයගේ ගෙදරින් කිව්වලු සීයට අතන මෙතන හම්බවෙන්න තියාගන්න එපා. ඕනෙ වෙලාවක ගෙදරට ඇවිත් කතාබහ කරල යන්න කියලා. (අපි ඇහුව කතාබහ විතරද කියලා, සීයා කිව්ව " නෑ අහවල් එකට " කියලා, අපි පස්සේ ඔය අහවල් එක ගැනත් සෑහෙන දේවල් අහගත්ත උන්දෑගෙන් Hikzzz)
සීයා බොන එකත් ටික ටික අඩු කලාලු, අරක්කු පෙරන රැකියාවත් අත්හැරලා සීයාගේ තාත්තත් එක්ක එකතු වෙලා කුඹුරු වැඩ කරන්න පටන්ගත්තලු. (කෙල්ල හින්දා සීයා හොද ළමයෙක් වෙලා) මාස කීපයක් සීයා කෙල්ලගෙ ගෙදර ආව ගියාලු. මංගල්ලයකට දින වකවානු එහෙමත් කතාබහ කරගෙනලු හිටියේ. දවසක් සීයා ආච්චිව හම්බවෙන්න අවේලාවේ ගියාලු (රෑ 12 විතර), අපිනම් ඔව්වට කියන්නේ කොටු පනිනව කියලානේ.... ඉස්සරත් ඔය වගේ සීන් වෙලා තියනව නේද බලන් යනකොට. (අපිනම් ඔහොම නෑ ඕං....) මල කෙළියක් තමයි එදා වෙලා තියෙන්නේ. සීයා ආච්චිව වත්ත පහල කෝපි පදුරකට හේත්තු කරගෙනලු, (මොනව කළාද කියල සීයාගෙන් ඇහුවට කිව්වේ නෑ..... ඔන එකක් හිතාගන්න. මමනම් හිතුවේ කොපි කඩන්න ඇති කියලා) ඔය අස්සේ ආච්චිලාගේ තාත්තා හුලුඅත්තකුත් පත්තු කරගෙන හිතුවෙ නැති විදිහට කඩාපාත් වුණාලු. දෙන්නව අතේ මාට්ටුලු. වැටමාර පොල්ලක් කැඩෙනකම් දෙන්නටම හොදට නෙලල සීයට යන්න කිව්වලු. තව දවස් තුනකින් මගුල කරනව කිව්වලු. දැන් සීයට පට්ට නෝන්ඩිලු. උදේම සීයලාගේ තාත්ත හම්බවෙන්න ආච්චිගේ තාත්ත එනව කියලත් කිව්වලු. සීයාට ෆුල් අවුල් ලු.සීයා යනගමන් අවුලටත් එක්ක බොන්න ඔනෙ කියලා හිතාගෙන සීයා දන්න පොට් එකකට ගිහින් හොදට බිව්වලු. බීලා ඉවර වෙලා පුරැදු පාරෙන් ගෙදර එන්න පිටත් වුණාලු...
මම මුල් කොටසේ කියපු කනත්ත පහුකරගෙන සීයා දැන් එනවලු.සීයට දැනෙනවලු පාරේ යනව යනව ඉවරයක් නෑ කියල, (ඔය පාරෙ මස් මාලු, බැදුම් කාල යන මිනිසුන්ව යම් කිසි බලවේගයක් විසින් මං මුලා කරනව කියල ජනප්රවාදයක් අපේ ගමේ තියනව).ෙඔහොම ටික දුරක් යනකොට ගොඩා...ක් උස කලුම කලු මිනිහෙක් පාරෙ හිටගෙන ඉන්නවලු, කකුල් දෙක පාර දෙපැත්තෙලු. සීය යකාටවත් බය නැති මිනිහා වුණාට හීන් දාඩිය දැම්මලු. සීයගේ වෙරි හිදුනලු. ඔන මගුලක් කියලා සීයා රිංගුවලු අරූගේ කකුල් දෙක යටින්. (යකාට හෙන අවුල් යන්නැති නේ..... ) රිංගල ඉවරවුණා විතරලු මෙන්න ආයේ ඉන්නවලු ඉස්සරහට වෙලා. දෙතුන් වතාවක් රිංගපු සීයාට දැන් බයටත් වඩා ඇති වුණේ තරහක්ලු. හිරේ යන්න හරි අනිනව කියල හිතාගෙන ගත්තලු ඉනේ තියෙන කිනිස්ස ඇදල. ඇන්නලු යකාගේ කකුලට ඩෝං ගාල. යකත් දුන්නලු පාරක් සීයා වැටුනලු ඇලට.සීයත් චණ්ඩියනේ ඉතින්, අතඇරියේ නෑලු ගේම. ඇන්නලු අනිත් කකුලටත් යකාගේ. පැය බාගයක් විතර යනකම් යකත් එක්ක දැවැන්ත සටනක් ලු , ඔය අතරෙ සීයාට තේරැණාලු මේ යකා එක්ක ගහගන බේරෙන්න බෑ කියලා.
සීයට කවුරැ හරි කොදුරනව වගේ ඇහුණලු "පුතේ මම උඹට පොඩිකාලේ කියලා දුන්නු මන්තරේ මතක් කරගනින් කියලා" ඒත් එක්කම සීයාට මතක් වුණාලු මේ වෙලාවට එන්නේ සූනියම් දෙවියන්ගේ දරැණු වෙස් ඇති අවතාරයන් බව. සූනියම් දෙවියන්ගේ අවතාර වලින් ආරක්ෂා වීමට අවශ්ය ශ්රී විශ්ණු කාලෙම සීයාට මතක් වෙලා. සීයා පට ගාල වැලි අහුරක් අරගෙන ශ්රී විශ්ණු කාළමෙන් වැලි අහුරට මතුරල ගැහුවලු අවතාරය දිහාට. අවතාරෙ ක්රමයෙන් වෙනස් වෙලා සාමාන්ය මනුස්ස ස්වරූපයක් මවාගෙන "උඹ උඹේ මුත්තා නිසා බේරැණා" කියලා අතුරැදහන් වුණාලු.
පස්සෙලු සීයාට කල්පනා වුනේ සීයාට රහසින් වගේ ඇහිලා තියෙන හඩ සීයාගේ මුත්තාගේ කියලා...
ඔය කතාව අහලා ඉවර වෙලා අපි සෙට් එක ගෙදර එන්න පිටත් වුණා. ගෙදරට එනකොට වෙලාව පාන්දර 03.00 විතර වෙලා. අපි පාඩම් කළේ නෑ... තව තවත් හොල්මන් කතා කිය කිය හිටියා.....
No comments:
Post a Comment
මොනවා හරි ලියලා යන්න හොදද නරකද කියලා