විහාරමහා දේවය සිතුල් පව්වේ භික්ෂූන් වහන්සේලාට දන් පැන් පූජා කරමින් ශාසනය රැක ගන්නට පුළුවන් දරැවෙකු පතනවා..........
01. සිතුල් පව්වෙ සග ගණ වැඩ සිටිනා
විසල් ගුණය රැදි සිල් කද දරනා
නිසල් සිතින් සමවත තුල සිටිනා
කමල් පුදමු සග රැවනට තුටිනා
ඒ අතර සාමණේර ස්වාමීන් වහන්සේ නමක් අසනිප වෙලා මරණාසන්නව සිටිනවා.
02. හෙරණ නමක් මේ අතර සිටින්නේ
ලෙඩ දුක් මැද දහමේ හැසිරෙන්නේ
අවසන් මොහොතට එළඹ සිටින්නේ
සගරැවනට මේ බව සැලවෙන්නේ
03. විහා මහ දේවියට කියන්නේ
හනිකට එතුමිය එතැනට එන්නේ
හෙරණ නමගෙ සිත පහදාලන්නේ
බුදු සසුනයි රැක ගත යුතු වන්නේ
04. දේවියගෙන් ඇරයුමක් ලැබෙනවා
තම කුල පිළිසිද ගන්න කියනවා
පින් ඇති හිමි නම අපවත් වෙනවා
ගැමුණු කුමරැ ලෙස උපත ලබනවා
05. පුර පස සද මඩලක් ලෙස වැඩෙනා
ගැමුණු කුමරැ සසරේ පින් තිබෙනා
බල වීරිය ඥානය තුල දිලෙනා
එඩිතර සිත ඇත සිරිලක රකිනා
ගෞතම බුද්ධ ශාසනයේ වාසනාවට ගැමුණු කුමාරයා සිංහල ද්වීපය එක්සේසත් කරලා රජකමට පත්වෙනවා.
01. සැප විදුමට රජකම නොපතන්නේ
බල තණ්හාවෙන් වියරැ නොවන්නේ
සැප සලසන්නට සියලු සතුන්නේ
රට රැකගන්නට සටනට එන්නේ
02. මිසදුටු බල හැම සුන් වී යන්නේ
පරසතුරන්ගෙන් රට මුදවන්නේ
යලි සිරිලක එක්සේසත් වන්නේ
ගැමුණු කුමරැ සිරි ලක රජවන්නේ
03. රහතුන්ගෙන් ආසිරි ලැබ ගන්නේ
ගෞතම සසුනට ආල වඩන්නේ
දන් පැන් පුදමින් පින් කර ගන්නේ
දෙව් ලොවටත් කිතුගොස පැතිරෙන්නේ
04. සටන් වැදී සතුරන් සමගින්නේ
සිටි කල ලුණු මිරිසක් වලදින්නේ
සග රැවනට පිදුමට බැරි වන්නේ
වරදක් බව එය සිහි කරලන්නේ
05. සිරස නමා සග රැවන පුදන්නේ
වරදට පිලියම් ඇතැයි කියන්නේ
සරසන සිත පින්කමක් කරන්නේ
මිරිසවැටිය මහ සෑ කරවන්නේ
දුටුගැමුණු රජතුමාට මාලිගාවේ කරඩුවකින් රන්පතක් ලැබෙනවා. ඒ රන්පතේ ලියා තිබෙනවා මිහිදු මහරහතන් වහන්සේ දෙවන පෑතිස් රජතුමාට පැවසූ දේ. මේ භූමියේ එක්සිය විසිරියන් උසට මහ සෑ හදන බව.
01. රජ මැදුරේ කරඩුවක් තිබෙනවා
ඒ තුල සොද රන් පතක් දිලෙනවා
ගැමුණු රජුට කියවන්ට ලැබෙනවා
මේ අයුරින් එහි ලියා තිබෙනවා
02. මිහිදු මා හිමි දෙවන පෑතිස් - රජුට මෙලෙසන් වදහලේ
සියලු සිරිලක සතුරැ බල බිද - මුණුබුරෙක් රජ වන කලේ
දුටුගැමුණු යන නමින් පරසිදු - සිටින පතුරා තෙද බලේ
උතුම් ගෞතම සසුන බබලන - යුගය එනු ඇත එම කලේ
03. තව්තිසාවේ සුධර්මා නම් - දෙව් සභාවේ විලසිනේ
මහළ් නවයක් උසින් දලෙනා - උතුම් මැදුරක් කරමිනේ
සිල් පුරන්නට සගරැවන හට - පොහොය ගෙයි එහි බදිමිනේ
ලෝව මහ පා නමින් ලොව එය - දිලෙනු ඇත හිරැ විලසිනේම
04. උසින් එක්සිය විසි රියන් ඇති - මහා සෑයක් තනවමින්
ද්රෝණයක් මුනි ධාතු රදවා - ස්වර්ණමාලි යන නමින්
කල්පයක් බුදු ගුණ ගයන්නට - දෙව් මිනිස් හැම එක් වෙමින්
බබලවයි බුදු සසුන කුමරැන් - රහත් යුගයට උරදෙමින්
(පූජ්ය කිරිබත්ගොඩ ඥාණානන්ද හිමියන්ගේ කෘතියකින්)
(පූජ්ය කිරිබත්ගොඩ ඥාණානන්ද හිමියන්ගේ කෘතියකින්)
No comments:
Post a Comment
මොනවා හරි ලියලා යන්න හොදද නරකද කියලා